un baaton ko bhi hai,
jo ab hoti nahin hain.
un raaton ko bhi hain,
jo ab sooti nahin hain,
us chadar ko bhi hai,
jo bistar ke ek taraf ab khinchti nahin hai
har us subaha ko bhi hai,
jo ab adhuri si akele hi aajaati hai,
bas vahi,
intezaar.

in sadko ko bhi hai,
un moodon ko bhi hai,
mera tumhara,
aur hum jaise na jane kitno ka,
jo inpe yun hi phire the,
ghadi ki suiiyan,
rokk dene ko aade the.
bas vahi,
intezaar ,
bada anokha word hai ye,
samay ki dardhta,
hiridya ki vedna
aur dimag ki adheerta,
sabhi isme nihit hain.

bachhpan se jawani ka,
jawani se kamyabi ka..
bas vahi hai,
intezaar.
haan in sab ke beech,
aur bahut kuch aata hai,
jise hum bhool-chook me,
life keh dete hain,
par vo to
aate-jaate lamhe hain,
kuch jaan ke kiye,
kuch ayinve hi hue,
kisse hain,
jo kabhi to pani ban,
chahere ke kone se,
behete hain,
to kabhi colgate se brush karne ka,
acchha bahana bhi dete hain.
vo to sapne hain,
jo kabhi sote hue dekhe,
to kabhi jaagte hue toote.
life to bas vahi hai,
intezaar.